(شعر بالعامّية)لسعاد الخرّاط من صفاقس
متابعة عبدالله القطاري من تونس
أنا حرّة بنت الحرّة
واحنا الكلّ بنات أحرار
فينا بسمة
وفينا مباركة
وفينا زينة الدوّار
اللي يشرّفوا المسلمين
والعرب المتجمعين
وفينا الحاجّة أمّ الغالي والشهيد والجنرال
وفينا للاّ منوبيّة اللي ولادها يحموا الدار
فينا اللي تزيّن المحفل
وفينا اللي تعمّر الدار
وفينا اللي تجلجل وتصول
تجيب الحجّة والأصول
وفينا وفينا ويا ما شا الله
لا نتباع بكنوز الدنيا
ولا يدوسوا علينا الأنذال
نترحّم علّي جابونا
وعلّي قرّوا وما حجبونا
احنا الكلّ بنات أحرار
أحنا تاج بلادي الحرّة
واحنا اللي نربّي الأحرار
واحنا اللي نزرع البسمة
واحنا اللي نبارك لعمار
واحنا اللي ناخذ بالثار
ماش بالدّم ولا بالهمّ
ثارنا نجيبو بالتدبير
لا تبلعيط ولا تجودير
أنا حرّة بنت الحرّة
واحنا الكلّ بنات أحرار
12/8/2013
إرسال تعليق