بقلم الكاتبة والفنانة التشكيلية
هبة الله يوسف محمود سند
المستشار الإعلامي لجريدة الهرم المصري نيوز
من ضمن أقوال كتير فى مجتمع عايش على تُراث ومعتقدات زمن فات ومحافظ عليها أكتر ما بيحافظ على نفسه وروحه .
ما زلت عند رأيي أنه مجتمع مُتخلف هو ومعتقداته وأقواله .
محدش هنا ليه رأي في إتجاهات حياتنا ومثارها.
لا الناس ولا المجتمع ولا العلماء كلها آراء شخصيه وإجتهادات في التفسير عندي مش أكتر .
لكن عندي الحلال بين والحرام بين وربنا ذاكره في كتابه والرسول عليه أفضل الصلاة والسلام فسره في أحاديثه.
أي آراء للعلماء ما هو إلا إجتهاد فالتفسير مش أكتر حسب وجهة نظرهم هم في التفسير مش أكتر ، وربنا خلق لكل واحد فينا عقل يستخدمه فالتفسير ، فالنهايه كلنا بشر ولله المثل الاعلى والأعم والأشمل
بس أعذروني
مين هنا اللي بيحدد الصح أو الغلط ؟
مين هنا اللي حدد الوقت والتوقيت لدخول أو خروج شخص ما فى حياتنا ؟
مين اللي حدد إن أي شخص بيدخل فى حياتنا شخص صح ودخل في وقت غلط؟
أو شخص غلط ندمنا علـى دخوله حياتنا.
أكيد لا أنا ولا أي حد فيكم .
مش يمكن يكون العكس إن ده شخص غلط دخل فى وقته الصح ، ودخوله ده لسبب .
لتصحيح طبع أو أفكار. درس لينا مش هنتعلمه غير بدخوله حياتنا ،
زي خبطه على دماغنا تفوقنا من خلل في تصرفنا أو تفكيرنا.
ربنا ليه حكمة لوجوده فى حياتنا فى الوقت ده بالذات .
لا قبل ولا بعد .
زى جسر بنعبر بيه من مرحله لمرحله .
أكيد ربنا مسبب الأسباب جعل كل موقف بنمر بيه فى حياتنا لسبب مفيش حاجه صدفه ده قدر .
ساعات حد بيكون فى فتره صعبه محتاج لحد جانبه.
ربنا يبعت له شخص يدخل حياته فى الوقت ده رحمه به تسنده.
قدر ، وهديه له ربنا عالم إنه محتاجها في الوقت ده فوضعه في طريقه رحمه به وله .
وسبحانه مسبب الأسباب .
يا يقبل هدايا ربه وعطاياه ، يا ينفر منها ويتبتر على نعمته.
ممكن الشخص ده يكون إقامه دائمة وممكن يكون لحين زوال السبب زى مضاد حيوي للأزمات ، بس رباني ، يخلص مهمته ويخرج تانى .
وبردوا خروجه هيبقى لسبب .
دخول حد حياتك فى الوقت ده رحمه منه ليك يقويك .
إنت بقى هتكون أنصح وأعلم من ربك عشان تقول ده وقت غلط .
النظره والفكرة والإعتقاد الغبي ده بيضيع من إيدينا حاجات كتير صح وهدايا وفرص من ربنا عشان جهلنا بقدرته ورحمته ، وعدم الرضا بقدره، وعدم إيماننا بيه إيمان صح إن هدايا ربنا لينا ورحمته علينا بيبعتها لنا فى أي وقت .
الوقت الصح والوقت الغلط ده مفهوم متخلف وده شيء نسبي ومتغير من شخص للثاني حسب مفهوم كل واحد للصح والغلط .
لكن رحمة ربنا غير ،
والوقت عنده غير .
أشار إليه سبحانه وتعالى فى صورة السجدة
{ فِي يَوْمٍ كَانَ مِقْدَارُهُ أَلْفَ سَنَةٍ مِّمَّا تَعُدُّونَ }
وهناك آيات كثيره فى القرآن عن التوقيت والوقت عند الله سبحانه وتعالى
فحقيقة عمر الدنيا فى الدين ساعه
كما فسرها العلماء
لقوله عزوجل: «وَيَوْمَ يَحْشُرُهُمْ كَأَنْ لَمْ يَلْبَثُوا إِلَّا سَاعَةً مِنَ النَّهَارِ يَتَعَارَفُونَ بَيْنَهُمْ قَدْ خَسِرَ الَّذِينَ كَذَّبُوا بِلِقَاءِ اللَّهِ وَمَا كَانُوا مُهْتَدِينَ»، سورة يونس : آية 45.
وهناك كثير من العلماء فسروا كلام الله عز وجل لمفهوم التوقيت بين الدنيا والآخرة ولكم في ذلك حرية البحث والإطلاع .
كل حاجه وكل شخص بيمر فى حياتنا بيمر لسبب
أيًا كان السبب من وجهة نظرنا
نظرة ربنا أعم وأشمل من إننا نختصرها فى نظرتنا المحدوده .
زى الأب أو الأم( ولله المثل الأعلى) اللي بيقرروا عن أولادهم لصغر سنهم ، وضيق تفكيرهم ، وعدم قدرتهم على تقدير الامور.
يعنى يا أخى أديت نفسك الحق تقرر عن أولادك وأنك فاهم أكثر وأكبر ونظرتك أعمق .
وناكر وجود الحق ده لربك الأعلى والأعلم .
وترفض نعمته وفضله عليك بجهل وتخلف إنها آه صح بس فى وقت غلط .
أو غلط أصلا زي غيرها مافيهاش خير.
قبل ما ترفضوا وتفقدوا من إيديكم نعم أنعم الله بها عليكم لجهلكم وسوء تقديركم للأمور ، وتذكروا إن الله مسبب الاسباب ، دوروا الأول على حكمته في دخول الشخص ده حياتكم ، ايه اللي اتغير في حياتكم وتفكيركم بدخوله ، أثر فيكم من اي اتجاه ، سلبي والا ايجابي ، دوروا على حكمته وانتم هتتأكدوا من عظمته ورحمته.
بدل ما تعيشوا فى واقع مؤلم أنتم بكامل ارادتكم إتمسكتم به ، ورفضتوا بجهل عطاء ربكم إليكم ، حافظوا على ما تبقى من نعم حولكم حتى لا تعيشوا بإختياركم
جحيمكم في الدنيا .
لنا الله
🔥هہمہسہآتہ حہآئرة🔥
#همسات_حائرة
إرسال تعليق