بقلم / عبير خضر ✍️
كتير بنسمع وعود الحب، كلام كبير واتصالات مليانة وعود إن "بكرة هيكون أحسن"، وإنه "هتغير عشانك"، وإنه "مش هيكرر غلطه تاني". بس الحقيقة إن الحب مش كلام بيتقال، الحب فعل، ولو الفعل مش موجود، يبقى الكلام ملوش قيمة.
لما تعيشي على وعود شخص بيقول إنه هيتغير أو هيبقى أحسن، إنتِ في الحقيقة مش عايشة في حب، إنتِ عايشة في وهم. الراجل اللي بيحب بجد مش هيخليكي تستني إصلاح مش بيحصل، ولا هيحطك في دايرة خذلان وأمل كداب. الحب الحقيقي بيتشاف في التصرفات، مش في الكلام المعسول.
الأفعال بتتكلم: الحب الحقيقي بيبان في التصرفات اليومية، في الاهتمام الحقيقي، مش في لحظات العاطفة اللي بتيجي وتروح.
كلامه وأفعاله واحد: لو بيحبك بجد، مش هيقول حاجة ويعمل عكسها. وعوده مش مجرد كلام بيتقال ويتنسي، لكن أفعال بتثبت إنه مسؤول عن اللي بيقوله.
مش هتحتاجي تلاقي له أعذار: لما تكوني مع حد بيحبك بجد، مش هتعيشي طول الوقت تبرري تصرفاته لنفسك أو للناس، ولا هتبقي في حالة انتظار مستمر.
الحب مش إنك تتمسكي بحد بيعرف يعتذر كويس، الحب إنك تكوني مع حد من البداية مبيغلطش في حقك. متصدقيش كلام بيتقال في لحظات ضعف، بصي للأفعال اللي بتقولك كل يوم إنكِ أولوية، مش مجرد وعد اتقال واتنسى. الحب مش جملة حلوة، الحب فعل بيتكرر كل يوم دون تأخير أو تردد.
إرسال تعليق